સુરતમાં રહેતા એક વિકલાંગ યુવકે વર્ષ 2017માં ફેસબુકના માધ્યમથી ફિલિપિન્સની મહિલા સાથે મિત્રતા કરી હતી. બંને વચ્ચે વાતચીત એવી ચાલી કે તેઓ એકબીજાના પ્રેમમાં પડી ગયા. હવે બંને 20 નવેમ્બરે લગ્ન કરવા જઈ રહ્યા છે. આવો જાણીએ આ લવ સ્ટોરી વિશે વિગતવાર...
કહેવાય છે કે પ્રેમ કોઈ જાત-પાત અને અમીર-ગરીબને આધીન નથી હોતો. આવો જ એક કિસ્સો ગુજરાતના સુરતમાંથી સામે આવ્યો છે. અહીં પાન વેચતા એક વિકલાંગ યુવકની ફિલિપિન્સની એક મહિલા સાથે ફેસબુક પર મિત્રતા થઈ હતી. વાતનો સીલસીલો એવો ચાલ્યો કે બંનેની મિત્રતા પ્રેમમાં બદલાઈ ગઈ. હવે બંને 20 નવેમ્બરે લગ્ન કરવા જઈ રહ્યા છે.
બંનેની લવ સ્ટોરી ખૂબ જ રસપ્રદ છે. મળતી માહિતી મુજબ દસ પાસ સુરતના યુવકને અંગ્રેજી ભાષા પણ આવડતી ન હતી. પણ કહેવાય છે કે પ્રેમ બધું શીખવે છે. એ જ રીતે ટ્રાન્સલેશનની એપ્લિકેશન દ્વારા બંને વચ્ચે ફેસબુક પર ચેટિંગ થયું અને થોડા વર્ષો પછી તેઓએ લગ્ન કરવાનું નક્કી કર્યું. મહિલા લગ્ન માટે સુરત આવી છે. કારણ કે બંને અહીં જ લગ્ન કરશે.
પાનની દુકાન ચલાવે છે કલ્પેશ
મળતી માહિતી મુજબ સુરત વરાછા વિસ્તારમાં યોગી ચોક પાસે પાનની દુકાન ચલાવતા કલ્પેશ ભાઈ માવજીભાઈ કાછડિયા વિકલાંગ છે. તે ચાલી શકતો નથી. 43 વર્ષીય કલ્પેશના પરિવારમાં બે બહેનો અને એક ભાઈ છે. તેમના પરિવારમાં બધા પરિણીત છે. તે વિકલાંગ હોવાથી લગ્ન કરવા માંગતો ન હતો.
ફેસબુક પર થઇ રેબેકા સાથે મિત્રતા
ત્યારબાદ 2017માં તેને ફેસબુક પર 42 વર્ષની રેબેકા નામની મહિલાની ફ્રેન્ડ રિક્વેસ્ટ મળી હતી.પછી બંને વચ્ચે મિત્રતા થઈ હતી. કલ્પેશને અંગ્રેજી આવડતું નહોતું એટલે રેબેકાનો મેસેજ આવે ત્યારે તે તેના મિત્રોને પૂછીને જવાબ આપતો. પછી તેણે અંગ્રેજી એપ્લિકેશન દ્વારા જવાબ આપવાનું શરૂ કર્યું.
લોકડાઉનને કારણે ભારત આવી શકી ન હતી રેબેકા
તેને તેની આખી કહાની રેબેકાને કહી કે તે શારીરિક રીતે વિકલાંગ છે. રેબેકાએ પણ કહ્યું કે તેના પતિનું અવસાન થયું છે અને તે હવે સિંગલ છે. બંને એકબીજાની એટલા નજીક આવ્યા કે તેઓ એકબીજાના પ્રેમમાં પડી ગયા. રેબેકા અને કલ્પેશ છેલ્લા 5 વર્ષથી એકબીજાના સંપર્કમાં છે. બંને એકબીજા સાથે લગ્ન કરવા માંગતા હતા. તેથી જ રેબેકાએ 2020માં ભારત આવવાનો પ્લાન પણ બનાવ્યો હતો. તેની ટિકિટ પણ બુક થઈ ગઈ હતી. પરંતુ તે દરમિયાન 24 માર્ચ 2020 ના રોજ દેશમાં લોકડાઉન થઇ ગયું હતું. જેના કારણે તે ભારત આવી શકી ન હતી.
20 નવેમ્બરે થશે લગ્ન
પરંતુ તેમ છતાં બંને એકબીજાના સંપર્કમાં હતા. આ વખતે રેબેકાએ નક્કી કર્યું હતું કે તે ભારત આવીને કલ્પેશ સાથે લગ્ન કરશે. રેબેકા ઓક્ટોબર 2022માં દિવાળીના દિવસે ભારત આવી હતી. બંને એકબીજાને મળીને ખૂબ જ ખુશ હતા. કલ્પેશે પરિવારના સભ્યો સાથે રેબેકાનો પરિચય પણ કરાવ્યો હતો. ત્યારબાદ પરિવારના સભ્યો પણ બંનેના લગ્ન માટે સંમત થયા હતા. હવે બંને ભારતીય પરંપરા અનુસાર 20 નવેમ્બરે લગ્ન કરશે.
0 Comments