રોજર બિન્ની BCCI પ્રેસિડેન્ટઃ રોજર બિન્ની BCCIના 36માં પ્રમુખ બન્યા ત્યારથી તેમને દરેક જગ્યાએથી અભિનંદનના સંદેશા મળી રહ્યા છે. આ યાદીમાં તેમની પુત્રવધૂ અને સ્પોર્ટ્સ પ્રેઝન્ટર મયંતી લેંગર પણ જોડાઈ ગઈ છે.
ભારતીય ક્રિકેટ કંટ્રોલ બોર્ડ (BCCI)ને નવા પ્રમુખ મળ્યા છે. ભૂતપૂર્વ કેપ્ટન સૌરવ ગાંગુલી પછી આ પદ રોજર બિન્નીએ સંભાળ્યું છે જે 1983ની વર્લ્ડ ચેમ્પિયન ટીમના સભ્ય હતા. મુંબઈમાં યોજાયેલી BCCIની 91મી વાર્ષિક સામાન્ય સભા (BCCI AGM)માં નવા પ્રમુખના નામની સત્તાવાર જાહેરાત કરવામાં આવી હતી. આ દરમિયાન રોજર બિન્નીની વહુ મયંતી લેંગરે પણ તેમને અભિનંદન પાઠવ્યા છે.
BCCI ચીફ બનનાર પ્રથમ વર્લ્ડ ચેમ્પિયન
BCCIના 36માં પ્રમુખ બન્યા બાદ રોજર બિન્નીના નામે એક ખાસ ઉપલબ્ધિ નોંધાઈ છે. કર્ણાટક સ્ટેટ ક્રિકેટ એસોસિએશન (KSCA)નું પ્રતિનિધિત્વ કરતા બિન્ની બિનહરીફ ચૂંટાયા હતા. બિન્ની BCCIના પ્રમુખ બનનાર પ્રથમ વર્લ્ડ કપ ચેમ્પિયન છે. જ્યારે ભારતે કપિલ દેવની કપ્તાનીમાં 1983માં પહેલીવાર ODI વર્લ્ડ કપ જીત્યો ત્યારે ઓલરાઉન્ડર બિન્ની ટીમ ઈન્ડિયાનો સભ્ય હતો.
રોજર બિન્નીને આપ્યા અભિનંદન
બીસીસીઆઈના અધ્યક્ષ પદ મળ્યા પછી રોજર બિન્નીને ચારેબાજુથી અભિનંદનના સંદેશા મળી રહ્યા છે. તેમની પુત્રવધૂ અને સ્પોર્ટ્સ પ્રેઝન્ટર મયંતી લેંગર પણ આ યાદીમાં જોડાઈ ગઈ છે. જોકે તેમણે પદ સંભાળ્યાના એક દિવસ બાદ રોજરને અભિનંદન પાઠવ્યા હતા. મયંતીએ એક અંગ્રેજી ન્યૂઝ પેપરનો એક ભાગ શેર કર્યો છે. આ એ સ્પોર્ટ્સ પેજ છે જેના પર રોજર બિન્નીના સમાચાર પણ છપાયા છે. મયંતીએ તેની સાથે હાર્ટ ઇમોજી પણ શેર કર્યું હતું.
શાનદાર ઓલરાઉન્ડર ગણાય છે
રોજર બિન્નીએ BCCI પ્રમુખ બનતા પહેલા ક્રિકેટર કોચ જેવી ઘણી ભૂમિકાઓ ભજવી છે. તેણે 27 ટેસ્ટ અને 72 વન-ડે ઈન્ટરનેશનલ મેચ રમી હતી. તેણે ટેસ્ટમાં 47 અને વનડે ફોર્મેટમાં 77 વિકેટ ઝડપી છે. તેણે ટેસ્ટમાં પાંચ અડધી સદીની મદદથી 830 રન બનાવ્યા જ્યારે વનડેમાં તેણે એક અડધી સદીના આધારે કુલ 629 રન બનાવ્યા. રોજરે તેની ફર્સ્ટ ક્લાસ ક્રિકેટ કારકિર્દીમાં કુલ 205 વિકેટ લીધી હતી. તેણે ડોમેસ્ટિક ક્રિકેટમાં ગોવા અને કર્ણાટકનું પ્રતિનિધિત્વ કર્યું હતું. પોતાની ફર્સ્ટ ક્લાસ કારકિર્દીમાં રોજરે કુલ 6579 રન બનાવ્યા જેમાં તેણે 14 સદી અને 33 અડધી સદી ફટકારી.
0 Comments