82 વર્ષની વયે નિધન મુલાયમ સિંહ યાદવનું મૃત્યુ, 8 વખત ધારાસભ્ય, 7 વખત સાંસદ અને 3 વખત રહ્યા હતા યુપીના મુખ્યમંત્રી

• આખરે ઉત્તર પ્રદેશના પૂર્વ મુખ્યમંત્રી મુલાયમ સિંહ યાદવનું બીમારી સામે લડતા લડતા નિધન થઈ ગયું. 82 વર્ષની ઉંમરે તેમણે ગુરુગ્રામની મેદાંતા હોસ્પિટલમાં અંતિમ શ્વાસ લીધા. મુલાયમ સિંહ યાદવ ઘણા દિવસોથી ગુરુગ્રામની મેદાંતા હોસ્પિટલમાં દાખલ હતા. તેની હાલત સતત બગડતી રહી હતી.

• ડૉક્ટરોની ટીમ નેતાજીને બચાવવાનો પૂરો પ્રયાસ કરી રહી હતી પરંતુ સોમવારે સવારે તેમનું મોત થયું હતું. તેમના અવસાનથી દેશમાં શોકની લહેર છવાઈ ગઈ હતી. મુલાયમ સિંહ સાથે રાજકારણના એક યુગનો પણ અંત આવ્યો. દેશના રાજકારણમાં મુલાયમની મજબૂત પકડ હતી.

• મુલાયમ સિંહ યાદવના મૃત્યુનું કારણ યુરિન ઈન્ફેક્શન, બ્લડ પ્રેશરની સમસ્યા અને શ્વાસ લેવામાં તકલીફ હોવાનું માનવામાં આવે છે. આ બધી સમસ્યાઓના કારણે સપાના સંરક્ષક અને ઉત્તર પ્રદેશના પૂર્વ મુખ્યમંત્રી મુલાયમ સિંહને ગંભીર હાલતમાં 2 ઓક્ટોબરના રોજ ગુરુગ્રામની મેદાંતા હોસ્પિટલમાં દાખલ કરવામાં આવ્યા હતા.

• 3 વખત બન્યા યુપીના મુખ્યમંત્રી...
• મુલાયમની તબિયત સતત બગડી રહી હતી અને તેઓ ખૂબ જ નબળા બની રહ્યા હતા. આઠ દિવસ હોસ્પિટલમાં દાખલ રહ્યા બાદ સોમવારે સવારે તેણે દુનિયાને અલવિદા કહી દીધું. મુલાયમ માત્ર ઉત્તર પ્રદેશ જ નહીં પરંતુ દેશના રાજકારણનો પણ મોટો ચહેરો હતા. તેમણે વસ્તીની દ્રષ્ટિએ દેશના સૌથી મોટા રાજ્ય ઉત્તર પ્રદેશની 3 વખત કમાન સંભાળી હતી. તેઓ 1989-91 સુધી અને પછી 1993-95 સુધી ઉત્તર પ્રદેશના મુખ્યમંત્રી રહ્યા. આ પછી 29 ઓગસ્ટ 2003 ના રોજ તેમણે ત્રીજી વખત યુપીના સીએમ તરીકે શપથ લીધા. નેતાજી 11 મે 2007 સુધી યુપીના સીએમ હતા.

• 8 વખત ધારાસભ્ય રહ્યા મુલાયમ
• મુલાયમ સિંહ યાદવને પણ 'નેતાજી' નામથી સંબોધતા હતા. નેતાજીની રાજકીય કારકિર્દી 50 વર્ષથી વધુ લાંબી હતી અને તે ખૂબ જ પ્રખ્યાત હતી. ત્રણ વખત યુપીના સીએમ હોવા ઉપરાંત આઠ વખત ધારાસભ્ય પણ રહ્યા હતા. તેઓ 1967, 1974, 1977, 1985, 1989, 1991, 1993 અને 1996માં ધારાસભ્ય તરીકે ચૂંટાયા હતા.

• મુલાયમ કુસ્તી છોડીને રાજકારણમાં આવ્યા હતા...
• નેતાજીનો જન્મ વર્ષ 1939માં ઈટાવા જિલ્લાના સૈફઈ ગામમાં 22 નવેમ્બરના રોજ એક ખેડૂત પરિવારમાં થયો હતો. મુલાયમ યુવાનીમાં કુસ્તી કરતા હતા. કુસ્તી છોડીને તેઓ રાજકારણના અખાડામાં આવ્યા હતા.

• 7 વખત લોકસભાના સાંસદ પણ હતા મુલાયમ
• મુલાયમ સિંહ યાદવનું રાજકીય કદ એ હકીકત પરથી પણ સમજી શકાય છે કે યુપીના ત્રણ વખત સીએમ અને આઠ વખત ધારાસભ્ય હોવા ઉપરાંત જનતાએ તેમને સાત વખત લોકસભાના સાંસદ પણ ચૂંટ્યા હતા. હાલમાં તેઓ મૈનપુરી સીટથી લોકસભાના સાંસદ હતા.

• 1992માં બનાવી સમાજવાદી પાર્ટી, કેન્દ્રમાં રક્ષા મંત્રી પણ હતા
• ઉત્તર પ્રદેશની રાજનીતિમાં 3 દાયકાથી આગવું સ્થાન જમાવી રહેલી સમાજવાદી પાર્ટીની રચના મુલાયમે વર્ષ 1992માં કરી હતી. નેતાજીએ 1996 થી 1998 સુધી કેન્દ્ર સરકારમાં રક્ષા મંત્રીનું પદ પણ સંભાળ્યું હતું.