ત્રિપુરાના મુખ્યમંત્રી બિપ્લવ દેબે શનિવારે પોતાના પદ પરથી રાજીનામું આપી દીધું છે. તેમણે પોતાનું રાજીનામું રાજ્યપાલ સત્યદેવ નારાયણ આર્યને સોંપ્યું છે. તેઓ શુક્રવારે ગૃહ પ્રધાન અમિત શાહને મળ્યા હતા, ત્યારબાદ તેમણે પદ છોડ્યું હતું. આ સાથે જ બીજેપી વિધાયક દળની બેઠક યોજાશે જેમાં નવા સીએમ અંગે ચર્ચા કરવામાં આવશે. બીજી તરફ ત્રિપુરામાં કેન્દ્રીય મંત્રી ભૂપેન્દ્ર યાદવ અને ભાજપના રાષ્ટ્રીય મહાસચિવ વિનોદ તાવડેને નિરીક્ષક બનાવવામાં આવ્યા છે.
બિપ્લવ દેબના રાજીનામાની સાથે જ રાજ્યમાં નવા સીએમના ચહેરાની ચર્ચા પણ તેજ થઈ ગઈ છે. કહેવામાં આવી રહ્યું છે કે ડો. માણિક સાહા, નાયબ મુખ્યમંત્રી જિષ્ણુ દેબ બર્મન અને કેન્દ્રીય રાજ્ય મંત્રી પ્રતિમા ભૌમિકના નામ નવા સીએમ માટે ટોચ પર છે.
બિપ્લવ દેબે મીડિયાને કહ્યું કે પાર્ટીનો નિર્ણય તેમના માટે સર્વોપરી છે. હાઈકમાન્ડના કહેવાથી તેમણે પોતાનું પદ છોડ્યું. મારા જેવા કાર્યકરને સંગઠન માટે કામ કરવાની જરૂર છે. જો કે નવા સીએમ કોણ હશે તે સવાલ પર તેમણે કોઈ જવાબ આપ્યો નથી.
બિપ્લવ દેબે કહ્યું કે અમારી પહેલી પ્રાથમિકતા ભાજપને ફરી સત્તામાં લાવવાની છે. અમારે ત્રિપુરામાં ભાજપને લાંબા સમય સુધી સત્તામાં રાખવાની જરૂર છે. જ્યાં સુધી અમારી પાસે મજબૂત સંગઠન છે. અમે સરકારમાં છીએ અને આ સૌથી મહત્વપૂર્ણ છે.
બિપ્લવ દેબને લઈને સંગઠનમાં નારાજગી વધી રહી હતી. બે ધારાસભ્યોએ પણ પાર્ટી છોડી દીધી હતી. તેમની સામે દિલ્હીમાં પાર્ટીના વરિષ્ઠ નેતાઓ દ્વારા લગાતાર ફરિયાદો કરવામાં આવી રહી હતી. તેમજ ભાજપ આગામી વિધાનસભા ચૂંટણીની રણનીતિને લઈને કોઈ જોખમ લેવા માંગતી નથી.
બિપ્લવ દેબ 2018માં સીએમ બન્યા હતા. ત્રિપુરામાં આવતા વર્ષે વિધાનસભાની ચૂંટણી યોજાવા જઈ રહી છે. રાજ્યમાં આવતા વર્ષે 2023માં ચૂંટણી યોજાવાની છે. ગુજરાતની તર્જ પર ત્રિપુરામાં મંત્રીથી લઈને સંગઠનમાં મોટા ફેરબદલ થઈ શકે છે. આવી સ્થિતિમાં ભાજપે પાર્ટીને મજબૂત કરવા માટે રાજ્યની કમાન નવા ચહેરાને સોંપવાનો નિર્ણય લીધો હોવાનું માનવામાં આવે છે.
0 Comments