સોમવારે જ્ઞાનવાપી મસ્જિદની વિડીયોગ્રાફી અને સર્વે પૂર્ણ થયો હતો. સર્વે બાદ બહાર આવેલા હિન્દુ પક્ષે મોટો દાવો કર્યો છે કે મસ્જિદની અંદર રહેલા કૂવામાંથી શિવલિંગ મળી આવ્યું છે. જ્ઞાનવાપી મસ્જિદ ત્રણ દિવસ સુધી ચાલી સર્વે સોમવારે સમાપ્ત થયો. દરમિયાન હિન્દુ પક્ષના વકીલ વિષ્ણુ જૈને દાવો કર્યો છે કે કુવામાંથી સર્વે દરમિયાન શિવલિંગ મળી આવ્યું હતું. હિન્દુ પક્ષના વકીલે તો દાવો કર્યો કે શિવલિંગની ઊંચાઈ 12 ફૂટ 8 ઈંચ છે. શિવલિંગ મેળવ્યા બાદ સર્વે ટીમે હર હર મહાદેવના નારા પણ લગાવ્યા હોવાનું જાણવા મળ્યું છે. તમને જણાવી દઈએ કે એવું માનવામાં આવતું હતું કે જ્ઞાનવાપી મસ્જિદ તરફ મુખ રાખીને બેઠેલી નંદીની મૂર્તિ કરતાં પણ મોટું શિવલિંગ હશે.
શિવલિંગના રક્ષણ માટે આવેદન
હિંદુ પક્ષના વકીલ વિષ્ણુ જૈને શિવલિંગની સુરક્ષા માટે સિવિલ કોર્ટમાં અરજી આપી હતી જે બાદ કોર્ટે સમગ્ર વિસ્તારને સીલ કરવા અને CRPF મૂકીને સુરક્ષા આપવાનો નિર્દેશ જારી કર્યો છે. હિંદુ પક્ષે અરજી કરી છે કે શિવલિંગની સુરક્ષાને લઈને કોઈ પરિસ્થિતિ ઊભી ન થાય. દરેક સમયે શિવલિંગની રક્ષા કરવી ખૂબ જ જરૂરી છે. બીજી તરફ મુસ્લિમ પક્ષે કહ્યું કે કોઈ શિવલિંગ મળ્યું નથી.
કૂવામાં કેમેરા નાખીને વિડીયોગ્રાફી કરી
સૂત્રોના જણાવ્યા પ્રમાણે સર્વે ટીમ નંદીની સામે બનેલા કૂવા તરફ આગળ વધી હતી. કૂવામાં વોટર રેઝિસ્ટન્ટ કેમેરા મૂકીને વીડિયોગ્રાફી પણ કરવામાં આવી છે. અગાઉ રવિવારે હાથ ધરાયેલા સર્વેમાં વેસ્ટર્ન વોલ, નમાઝ સાઇટ, વુઝુ સાઇટ ઉપરાંત ભોંયરામાં સર્વે કરવામાં આવ્યો હતો.
હવે ટીમ કોર્ટમાં રિપોર્ટ રજૂ કરશે
12 મેના રોજ કોર્ટે વારાણસીની જ્ઞાનવાપી મસ્જિદને લઈને મોટો નિર્ણય સંભળાવ્યો હતો. કોર્ટે જ્ઞાનવાપી મસ્જિદના સર્વે માટે નિયુક્ત એડવોકેટ કમિશનર અજય કુમાર મિશ્રાને હટાવવાનો ઇનકાર કર્યો હતો. જો કે કોર્ટ કમિશનર અજય મિશ્રા સિવાય કોર્ટે વિશાલ કુમાર સિંહને પણ કોર્ટ કમિશનર તરીકે નિયુક્ત કર્યા હતા. આ સિવાય અજય સિંહને આસિસ્ટન્ટ કમિશનર બનાવવામાં આવ્યા છે. કોર્ટે સર્વેની પ્રક્રિયા પૂર્ણ કરીને 17 મે સુધીમાં રિપોર્ટ દાખલ કરવા જણાવ્યું હતું.
અગાઉ રવિવારે પણ જ્ઞાનવાપી મસ્જિદનો સર્વે કરવામાં આવ્યો હતો. સર્વેની કામગીરી બીજા દિવસે 12 વાગ્યે પૂર્ણ થવાની હતી પરંતુ સર્વે નિર્ધારિત સમય કરતાં વધુ ચાલ્યો હતો. બીજા દિવસે જ્ઞાનવાપી મસ્જિદના ગુંબજ અને દિવાલોનું સર્વે કરવામાં આવ્યું હતું. અગાઉ સિવિલ જજ સિનિયર ડિવિઝનની કોર્ટના આદેશ પર, વાદી અને પ્રતિવાદી પક્ષ તેમજ કોર્ટ દ્વારા નિયુક્ત પ્રતિનિધિઓની ટીમ સર્વે માટે જ્ઞાનવાપી મસ્જિદ પહોંચી હતી.
0 Comments