ADJ મનોજ શુક્લા કોટ ટાઈમાં પોતાની જમીન બચાવવા JCBની સામે સૂઈ ગયા. તેમણે કહ્યું કે જમીન સંપાદન નિયમોની વિરુદ્ધ છે.
યુપીના સુલતાનપુરના એડીજે મનોજ શુક્લાને સસ્પેન્ડ કરવામાં આવ્યા છે. મનોજ શુક્લા ત્યારે ચર્ચામાં આવ્યા જ્યારે તેઓ તેમની વડીલોપાર્જિત જમીન બચાવવા માટે જેસીબી સામે સૂઈ ગયા. અલ્હાબાદ હાઈકોર્ટે તેમને સસ્પેન્ડ કરવાનો નિર્ણય કર્યો છે.
પ્રાપ્ત માહિતી અનુસાર અલ્હાબાદ હાઈકોર્ટે સુલતાનપુર જિલ્લા કોર્ટના એડિશનલ ડિસ્ટ્રિક્ટ જજ (ADJ) મનોજ કુમાર શુક્લાને બુલડોઝરની સામે સૂવા બદલ સસ્પેન્ડ કરી દીધા છે. આદેશ અનુસાર એડીજે શુક્લાની વર્તણૂકની નોંધ લેતા હાઇકોર્ટની વહીવટી સમિતિએ તેમને સસ્પેન્ડ કરવાનો નિર્ણય લીધો છે. આ આદેશ સુલતાનપુર ડિસ્ટ્રિક્ટ કોર્ટમાં મોકલવામાં આવ્યો છે.
એડીજે શુક્લા ઉત્તર પ્રદેશના બસ્તી જિલ્લાના છપિયા શુક્લા ગામના રહેવાસી છે. તેમની જમીન જિલ્લા વહીવટીતંત્ર દ્વારા હરિયા-રજવાહા સરયુ કેનાલના નિર્માણ માટે સંપાદિત કરવામાં આવી હતી. આ નહેર સરયુ નહેર રાષ્ટ્રીય પ્રોજેક્ટનો એક ભાગ છે જેનું ઉદઘાટન ગયા વર્ષે ડિસેમ્બરમાં વડાપ્રધાન નરેન્દ્ર મોદીએ કર્યું હતું.
આ જમીન એડીજે શુક્લાના પિતાના નામે છે. જણાવવામાં આવી રહ્યું છે કે રાજ્યના સિંચાઈ વિભાગે જિલ્લા પ્રશાસનને પત્ર લખીને પ્રોજેક્ટ માટે જમીન સંપાદનમાં મદદ માંગી હતી. સંપાદન પછી વહીવટીતંત્રે તમામ જમીન માલિકોને પત્રો મોકલ્યા અને થોડા સમય પછી બાંધકામનું કામ શરૂ થયું.
જણાવી દઈએ કે એડીજે શુક્લા આખી રાત જિલ્લા પ્રશાસનની ટીમની સામે કંઈપણ ખાધા-પીધા વગર જમીન પર પડ્યા રહ્યા હતા. પછી તેણે કહ્યું- "હું ન્યાયિક અધિકારી છું આ મારી પૈતૃક જમીન છે. અમારી જમીન પર અતિક્રમણ થઈ રહ્યું છે આ કામ ખોટું છે. જમીન સંપાદન નિયમો વિરુદ્ધ છે."
આ ઘટના બાદ બસ્તીના જિલ્લા મેજિસ્ટ્રેટે રાજ્ય સરકારને એક રિપોર્ટ મોકલ્યો જેણે તેને અલ્હાબાદ હાઈકોર્ટને મોકલી આપ્યો. જેના આધારે સસ્પેન્શનની કાર્યવાહી કરવામાં આવી હતી.
આ ઘટના અંગે સપા પ્રમુખ અને પૂર્વ મુખ્યમંત્રી અખિલેશ યાદવે ટ્વીટ કરીને યોગી સરકાર પર નિશાન સાધ્યું હતું. તેમણે કહ્યું હતું કે જો ન્યાયિક અધિકારી સાથે આવું થઈ શકે છે તો કલ્પના કરો કે સામાન્ય લોકોનું શું થઈ શકે છે.
0 Comments